Vinstrið – Áherslumál

Reykjavík er fyrir okkur öll

Reykjavík á að vera borg friðar og mannréttinda. Allar ákvarðanir um framtíð Reykjavíkur á að taka á grunni lýðræðis út frá jöfnuði, sjálfbærni og félagslegu réttlæti, með velferð og öryggi íbúa í fyrirrúmi.

Það er forgangsverkefni Vinstrisins að byggja og skapa borg og samfélag fyrir okkur öll.
Fólk í Reykjavík á að geta búið sér heimili og látið sér líða vel. Til þess þurfum við félagslegar lausnir á öllum sviðum borgarinnar sem nýtast heildinni — hvort sem það er uppbygging húsnæðis og innviða, þjónusta við íbúa eða menntun barna.
Með félagslegum lausnum sköpum við samfélag sem tekur utan um okkur öll.
Það á að vera gott að búa í Reykjavík, óháð stöðu, kyni, efnahag og uppruna.

Heimili og húsnæði

Húsnæði á að vera heimili og skal byggt fyrir fólk en ekki fjárfesta. Það á ekki að braska með heimili fólks!

Reykjavíkurborg á að auka framboð á húsnæði með afgerandi hætti til þess að fólk geti eignast eða leigt heimili til framtíðar með raunverulegt húsnæðisöryggi að leiðarljósi.
Borgin á að forgangsraða lóðum til óhagnaðardrifinnar uppbyggingar og stuðla að eðlilegri endurnýjun eða endurnýtingu á þeim byggingum sem þegar eru til staðar.
Húsnæði á að vera öruggt og til þess fallið að fólki líði vel í því. Ljósgæði, hljóðgæði, aðgengi og algild hönnun eiga ekki að vera forréttindi heldur fortakslaus hluti hönnunar og skipulags.
Allir íbúar eiga að hafa aðgang að grænum svæðum nálægt sér, í öllum hverfum borgarinnar, hönnuð og hirt þannig að þau séu íbúum til yndisauka.
Heimili eru mannréttindi, ekki markaðsvara!

Samgöngur

Almenningssamgöngur eru kjaramál. Gott flæði samgangna er umhverfismál. Það á að vera greiðfært um borgina og auðvelt að komast á milli staða. Vinstrið vill að Reykvíkingar hafi raunverulegt val um hvernig þeir fara á milli staða.

Gönguleiðir og gangstéttir eiga að vera öruggar. Almenningssamgöngur eiga að vera skilvirkar, áreiðanlegar og þægilegar.
Reykvíkingar eiga að geta reitt sig á öflugan Strætó á meðan beðið er eftir Borgarlínu. Bætum leiðakerfi innan og á milli hverfa og gerum almenningssamgöngur að raunverulegum valkosti strax.
Aukin ferðatíðni strætó auk gjaldfrelsis fyrir grunnskólabörn setur tóninn fyrir framtíðina.
Góðar almenningssamgöngur leysa umferðarhnúta, draga úr mengun og bæta bæði loftgæði og lífsgæði.
Við stöndum með Borgarlínu.

Menntun og jöfnuður

Menntakerfið er eitt af mikilvægustu jöfnunarkerfum samfélagsins. Ryðjum úr vegi efnahagslegum hindrunum fyrir öll börn.

Greiðum fyrir þátttöku barna vegna viðburða og ferða á vegum grunnskóla til að tryggja að ekkert barn standi utan hópsins vegna fátæktar.
Tryggjum áframhaldandi fríar skólamáltíðir í grunnskólum og aukum gæði þeirra. Tryggjum líka fríar skólamáltíðir og gæði þeirra í leikskólum.
Styðjum við menntakerfið, fjölgum leikskólaplássum og starfsfólki ásamt því að bæta starfsaðstæður allra sem þar vinna.
Förum nýjar leiðir til að tryggja jafnt aðgengi að túlkum, þroskaþjálfum, talmeinafræðingum, sálfræðingum og öðrum sérfræðingum í grunnskólum.

Menning og lífsgæði

Hlúum vel að því sem er gott og fallegt í Reykjavík. Höfuðborgin á að búa yfir iðandi og skemmtilegu lífi, bæði innandyra og utan.

Í ört vaxandi borg þarf að huga vel að fögrum almannarýmum sem laða til sín fólk og dýr.
Reykjavík á að vera lifandi borg með greiðu aðgengi að menningu, almenningsrýmum og listum fyrir alla. Stuðningur við listafólk og fjölbreytt menningarlíf eykur lífsgæði.
Við viljum gróskumikið menningar- og tónlistarlíf og ætlum að standa enn betur að stuðningi við fjölbreytta hópa listafólks.
Við styðjum listafólk meðal annars með úrbótasjóðum og húsaleigustuðningi fyrir vinnustofur og listarými.

Félagslíf og velferð

Drögum úr einmanaleika og félagslegri einangrun. Styrkjum félagsmiðstöðvar og frístundastarf barna og unglinga. Tryggjum öldruðum viðeigandi þjónustu og öflugt félagsstarf.

Tryggjum öryggi jaðarsettra hópa og vinnum eftir hugmyndafræði skaðaminnkunar.
Við stöndum vörð um mannréttindi og vinnum ötullega gegn bakslagi í jafnréttis- og mannréttindamálum.
Sköpum samfélag sem stendur undir því að vera fjölmenningarsamfélag — bjóðum nýtt fólk velkomið og styðjum markvisst við nýja íbúa Reykjavíkur.
Vinnum gegn fátækt og tryggjum að fjárhagsaðstoð sé raunverulegt öryggisnet sem dugi til mannsæmandi framfærslu.

Náttúruvernd í Reykjavík

Náttúran er okkur öllum lífsnauðsynleg. Verndum dýrmæt náttúrusvæði innan borgarinnar og friðlýsum fleiri svæði.

Verndum dýrmætar náttúruperlur innan borgarinnar og friðlýsum fleiri svæði.
Náttúrugæðin sem umlykja okkur eins og hreint loft og vatn eru undirstaða heilbrigðs samfélags. Aukum loftslags- og vatnsvernd.
Fjármögnum aðgerðir til að vernda loftslagið og lífbreytileikan í Reykjavík og leyfum því villta að vaxa í borgarlandinu.

Reykjavík sem vinnustaður

Reykjavíkurborg er stór vinnustaður. Borgin á að bera hag starfsfólks síns fyrir brjósti og tryggja öllu starfsfólki sínu mannsæmandi kjör, starfsaðstæður og aðbúnað.

Við viljum efla samstarf við verkalýðshreyfinguna til að tryggja að réttindi vinnandi fólks séu í forgrunni og að Reykjavíkurborg sé fyrirmyndarvinnustaður.
Reykjavíkurborg á ekki að útvista verkefnum eða störfum sem auka ójöfnuð. Með því að halda lykilverkefnum í rekstri borgarinnar getum við tryggt betri kjör, starfsöryggi og aukin gæði.
Vinda þarf ofan útvistun. Borgin á að bera ábyrgð á eigin þjónustu og fólkinu sem vinnur fyrir hana.